唔识就Out?宠物小精灵必知十件事_東方Sunday_传送门
唔识就Out?宠物小精灵必知十件事
東方Sunday
「Pokémon！日夜锻炼去取胜！」宠物小精灵陪伴全球无数小朋友成长，受欢迎程度实在无须多讲，而全球热爆手机游戏「Pokémon Go」日前终于登陆香港！无论大街小巷定Office，人人都拎住手机化身小精灵训练员，外国有人玩到冲出马路有人冲入警署，情况近乎疯狂！但相信有唔少朋友都唔明白，点解咁多人都为呢啲小精灵着晒迷？所以《新地网》依家就为你介绍有关Pokémon的十件事，可能你睇完都想玩埋一份！(1) Pokémon爸爸系边个？可能好多朋友以为Pokémon系任天堂原创，但其实另一间游戏公司Game Freak的创办人，田尻智先生先系真正的「宠物小精灵之父」！佢同任天堂喺1996年一同开放出GameBoy游戏《Pokémon 红?绿》，甫推出即疯魔全球！亦奠定日后所有《Pokémon》游戏的基本架构，例如玩家系一个小精灵训练员，目标是依次挑战八名道馆掌门人，并挑战四大天王和冠军，可以收集Pokémon等等。由于游戏大受欢迎，Pokémon喺1997年正式推出动画，并以小智及比卡超为主角，播出至今已经19年，乃日本的经典长寿动画，在世界各地都大受欢迎。(2) Capsule Monsters先系本名？田尻智在有「Pokémon」呢个概念时，其实本打算将呢个企划命名为《Capsule Monsters》，灵感系来自佢小时候玩过的胶囊玩具，因为佢认为打开胶囊一刻令人无比兴奋。后来佢发现《Capsule Monsters》呢个名已经被登记，于是就改用「Pocket Monsters」，而且加入日本人的英语发音趣味，只取名字的一部份，于是Pokémon就此诞生！(3) 宠物小精灵其实系咩嚟？故事背景系一个虚构世界，宠物小精灵系与人类共存的一种生物，不过当然唔系现实世界的猫猫狗狗咁简单。因为小精灵们拥有唔同属性如水、火、土、雷系等，唔同属性自然就有唔同力量、唔同招式，好似比卡超就属于雷系小精灵，可以使出「十万伏特电击」等招式。好似打机咁样，小精灵获得一定的经验值或者成长至某个阶段，就可以进化成另一种小精灵。以同样好欢迎的车厘龟为例，佢可以进化成卡美龟，再进化成水战龟。不过某啲小精灵就只可以进化一次，甚至系唔会有进化阶段。截至今年七月，已出现了七代宠物小精灵，有逾740只！至于比卡超、小火龙等耳熟能详的名字，都系属于初代小精灵，有151只。小精灵种类极多，有可爱有凶恶有搞笑，总之一定有只啱你心水！(4) 精灵球又系咩嚟？要捉小精灵，首先你要有精灵球！其实精灵球系小精灵训练员的特殊道具，用于收服以及携带小精灵，只要将球抛各小精灵，精灵球就会释放出能量将小精灵吸入 (当然唔一定会成功) ；而平时小精灵就系存放喺球内，主人有需要时先释放出嚟。最常见的精灵球就系红白两色嗰款，不过其实游戏当中出现过极多种类的精灵球，唔同种类有唔同功能，用于捕捉唔同精灵。(5)比卡超唔系第一只宠物小精灵？大家都知道Pokémon系先由游戏后有动画，所以其实比卡超并唔系第一只小精灵，佢只系1997年推出动画后先成为主角。由官方的小精灵图鉴可见，编号001的其实是奇异种子，而比卡超则是025。不过如今看来，当年动画制作人员选比卡超为主角，绝对系独具慧眼！咁即系奇异种子就系第一只小精灵？非也！由《Capsule Monsters》(Pokémon前身)的概念图片中可见，首只小精灵好可能系铁甲暴龙！(6)小智点解会拣比卡超？每一个初出道的小精灵训练员，都可以去大木博士研究所获得一只小精灵，然后踏上修行之旅。点知小智喺呢个重要的日子瞓过龙，大家都好熟悉的小火龙、车厘龟及奇异种子已经俾人拣走，所以只剩低比卡超。比卡超虽然可爱但性情古怪，内向又唔亲近人类，所以一开始完全唔听小智话，系咁电到佢飞起不特止，仲唔肯好似其他小精灵咁进入精灵球。不过小智并冇因此讨厌比卡超，甚至决定放下主人的身份，与比卡超好似朋友咁样平等相处。之后佢哋一齐经历不少风雨，成为最密不可分的拍档。(7)比卡超点解唔会进化？话说喺动画第一季入面，讲到小智去到其中一个道馆挑战馆主，而该馆主的王牌正正就系比卡超的进化版 – 雷超。结果比卡超惨败后受伤，场主就送咗雷之石俾小智，希望佢令比卡超进化后再来挑战。此时小智心中犹豫，于是将进化与否的决定权交由比卡超自己决定，而比卡超系拒绝了！因为佢认为自己就算唔进化都一样可以打赢雷超，果然系有骨气！而另一个原因系，宠物小精灵进化后，性情或多或少都会有改变。例如本来好温驯的小火龙，进化至喷火龙后就会变霸道任性，好似忘记咗小智咁；又或者本来傻更更的傻鸭，进化至高超鸭后就变得冷酷无情。所以比卡超唔愿意进化，佢希望永远记得与小智的点点滴滴，以现时的状态与小智一同成长！后来仲出现比卡超的未进化版小精灵，叫做「比超」，劲可爱！(8) 宠物小精灵其实食得？喺宠物小精灵的世界，生物就只有人类同小精灵，咁佢哋啲食物到底从何来？嗰个世界啲人应该唔会全部都食素啩？事实上从动画唔少方面都可以估计得到，小精灵其实系可以食用的！不过考虑到道德层面，动画中都甚少明显地提及。例如小智与小刚就曾经幻想将鲤鱼王做刺身，游戏中亦有以小呆兽的尾巴作为食物。「火葱鸭」几乎濒临绝种，原来系因为被人类大量捕食……娇小的绿毛虫系唔少鸟类小精灵的最佳食物… 但动画当然唔会出现呢类情节啦。(9) 小智系最强人类？比卡超和小智总是形影不离，比卡超大部分时间都系坐喺小智膊头，甚至骑喺头上，成个画面相当温馨。不过根据官设定，比卡超的体重足足有六公斤(约13磅)！小智随时都可以将比卡超单手抱起，又可以长时间将13磅负重喺膊头，实在系唔简单…而呢只叫「由基拉」的小精灵，官方资料显示佢体重逾72公斤(约158磅)，小智一样可以将佢随手抱起甚至放喺背囊，最强男人非佢莫属！不过睇卡通又唔使咁认真嘅，呢啲趣事笑吓咪算！其实小智喺动画中多次展示出佢无穷臂力，可能佢除咗衫系个大只佬？网民实在创意无限！(10) 多边兽事件是甚么？宠物小精灵播出深受欢迎，当时世界各地的小朋友放学后都一定会返屋企追看(包括小编！)，但竟然曾经睇到出事！1997年时播出的第38集中，讲述小智一行人进入电脑世界与「多边兽」大战，比卡超以十万伏特电击抵抗导弹，之后画面发出爆破效果，强烈的红、蓝闪光以每秒12格的超高速闪烁不停。结果有685名日本小朋友出现「光敏感性癫痫症」(Photosensitive epilepsy，简称PSE )，动画更停播了半年。唔系讲笑，小编睇完个头都好似晕晕哋，落楼食个Tea休息吓先… 大家有兴趣可以上网自行揾段片睇。
觉得不错，分享给更多人看到
東方Sunday 微信二维码
分享这篇文章
東方Sunday 最新头条文章
東方Sunday 热门头条文章6被浏览2,344分享邀请回答01 条评论分享收藏感谢收起}